ఏమిటీ గురుత్వాకర్షణ తరంగాలు?
రేడియో తరంగాలు, దృశ్య కాంతి, ఎక్స్‌ కిరణాలు, ఇతర విద్యుదయస్కాంత తరంగాల తరహాలో గురుత్వాకర్షణ కూడా తరంగాల రూపంలో పయనిస్తుందని ఆల్బర్ట్‌ ఐన్‌స్టీన్‌ భావించారు. వందేళ్ల కిందట ఆయన తన సాపేక్ష సిద్ధాంతంలో వీటిని ప్రతిపాదించారు. వేగంగా కదులుతున్న ద్రవ్యరాశి ఏదైనా.. అంతరిక్షం, కాలంతో కూడిన వలలో సుడులను కలిగిస్తుందని అందులో పేర్కొన్నారు. అంతరిక్షంలో చోటుచేసుకునే బీభత్స ఘటనల్లో అవి ఉత్పత్తవుతాయి. ఆ తరంగాల ఉనికిని శాస్త్రవేత్తలు ఇప్పటివరకూ వూహిస్తూ వచ్చారు. తాజాగా వాటి ఉనికి రుజువైంది.
ఏమిటా ఘటనలు?
సాధారణంగా ఈ తరంగాల ప్రభావం చాలా బలహీనంగా ఉంటుంది. భారీ వస్తువులు, అధిక త్వరణంతో కదులుతున్నప్పుడు మాత్రమే తమ పరిసరాల్లో గుర్తించదగ్గ స్థాయిలో కొంత వంపును తీసుకురాగలవు. అది కూడా స్వల్పస్థాయిలో ఉంటుంది. భారీ తారల విస్ఫోటాలు, మృతి చెందిన సాంద్రమైన నక్షత్రాలు ఢీ కొట్టుకోవడం; కృష్ణబిలాల, న్యూట్రాన్‌ నక్షత్రాల విలీనం వంటివి ఈ కోవలోకి వస్తాయి.
వాటిని గుర్తించడానికి ఎందుకింత సమయం పట్టింది?
తాజాగా ఎలా గుర్తించగలిగారు?
ఈ గురుత్వాకర్షణ తరంగాలను గుర్తించడానికి 'లేజర్‌ ఇంటర్‌ఫెరోమీటర్‌ గ్రావిటేషనల్‌-వేవ్‌ అబ్జర్వేటరీ' (లిగో)ను ఏర్పాటు చేశారు. దీనికింద రెండు లిగో ఇంటర్‌ఫెరోమీటర్లను లివింగ్‌స్టన్‌, హాన్‌ఫర్డ్‌లలో నేలమాళిగలో అమర్చారు. ఈ రెండింటి మధ్య దూరం 1865 మైళ్లు. ఈ గురుత్వాకర్షణ తరంగాలు కాంతి వేగంతో పయనిస్తాయన్న అంచనాలు ఉన్నాయి. అంతరిక్షం నుంచి వచ్చిన తరంగాన్ని ఒక లిగో వద్ద గుర్తిస్తే.. 10 మిల్లీ సెకన్ల తర్వాత రెండో లిగో వద్ద ఇది వెలుగు చూసింది.
భూమి మీదున్న ధ్వనులతో ఆటంకాలు ఏర్పడవా?
ఈ యంత్రంలోని పరికరాలను ప్రత్యేక వ్యవస్థలకు వేలాడదీసినప్పటికీ అవి మొత్తం కదులుతూనే ఉంటాయి. స్వల్ప స్థాయిలో కంపిస్తూనే ఉంటాయి. భూమి సహజసిద్ధ తరంగాలు (సాగరాల కెరటాలు తీరంలోకి చొచ్చుకురావడం వంటివి) వంటివి ఉండనే ఉంటాయి. అయితే సంవత్సరాల పరిశోధన వల్ల గురుత్వాకర్షణ తరంగ సంకేతాలు ఎలా ఉండాలన్నది శాస్త్రవేత్తలు సిమ్యులేట్‌ చేయగలిగారు. వీటిని సూపర్‌ కంప్యూటర్లు పట్టుకోగలవు. ఈ తరంగాలకు నిర్దిష్ట పౌనపున్యాలు ఉంటాయి.
ఈ ఆవిష్కార ప్రాధాన్యమేంటి?
కృష్ణబిలాలనే తీసుకోండి. వాటి ఉనికి గురించి మనకు పరోక్షంగానే తెలుసు. ఎందుకంటే ఆ భారీ ఖగోళ వస్తువుల బారి నుంచి కాంతి కూడా తప్పించుకోలేదు. వాటికి ఎలాంటి వెలుగు ఉండదు. అందువల్ల మన టెలిస్కోపులు కూడా వాటిని పట్టుకోలేవు. అందుకు భిన్నంగా గురుత్వాకర్షణ తరంగాలు నేరుగా ఈ కృష్ణబిలాల నుంచే వెలువడుతాయి. ఆ తరంగాల్లో కృష్ణబిలాల సమాచారం ఉంటుంది. దీన్నిబట్టి కృష్ణబిలాలను కూడా ప్రత్యక్షంగా గుర్తించే దిశగా మనం ముందడుగు వేసినట్లు భావించవచ్చు.
మరే ఇతర అంశాలను గుర్తించలేమా?
కృష్ణబిలాలే కాదు.. కాలంలో మరింత వెనక్కి వెళ్లి విశ్వం తీరుతెన్నులను పరిశీలించచ్చు. 13.8 బిలియన్‌ సంవత్సరాల కిందట విశ్వం పుట్టుకకు కారణమైన బిగ్‌బ్యాంగ్‌ గురించి తెలుసుకోవడానికీ వీలు కలుగుతుంది. బిగ్‌ బ్యాంగ్‌ తర్వాత 3.8 లక్షల సంవత్సరాల పరిణామాలను మనం చూడలేం. అప్పట్లో మనం వీక్షించగలిగే స్థాయిలో కాంతిని ఉత్పత్తి చేసేలా విశ్వం చల్లబడలేదు. అయితే ఆ 'చీకటి' విశ్వంలోనూ గురుత్వాకర్షణ తరంగాలు ఉన్నాయి. ఇవి వేటి గుండానైనా ఇట్టే దూసుకెళతాయి. వాటిలోని సందేశం చెక్కుచెదరదు. అందువల్ల వాటిని విప్పడం ద్వారా 'చీకటి' విశ్వం గురించి తెలుసుకోవచ్చు. న్యూట్రాన్‌ నక్షత్రాల రహస్యాలను ఆవిష్కరించవచ్చు. భౌతికశాస్త్రంలో ఉన్న అతిపెద్ద సమస్యలైన బలాల ఏకీకరణ, క్వాంటమ్‌ సిద్ధాంతాన్ని గురుత్వాకర్షణ శక్తితో ముడిపెట్టడం వంటి వాటిని పరిష్కరించడంలో ఇది వీలు కలిగిస్తుంది. ఇప్పటి వరకూ విశ్వాన్ని వీక్షిస్తూ వస్తున్నాం. ఇక నుంచి వినికిడి కూడా సాధ్యమవుతుంది.
ఆ పరిణామం ఎంతసేపు సాగింది?
ఢీ కొట్టుకున్న ఈ రెండు కృష్ణబిలాలు అంతరిక్ష సమయ వలలో ఒక భీతావహ తుపానును కలిగించాయి. ఈ తుపాను కేవలం 20 మిల్లీసెకన్లు మాత్రమే సాగింది. అయితే విశ్వంలోని అన్ని నక్షత్రాల నుంచి వెలువడిన శక్తి కన్నా 50 రెట్లు ఎక్కువ శక్తిని వెలువరించింది.
కామెంట్‌లు లేవు:
కామెంట్‌ను పోస్ట్ చేయండి